《經濟不停學》ETF都會退市同被人「打靶」，投資新手要學識

 　　我哋之前都分享過，係投資傳統ETF同槓桿類ETF上，要注意嘅細節同地方，跟住落嚟就要講吓，如果ETF宣布退市時候，投資者又應該點算好？原來槓桿類ETF係有機會同牛熊證一樣被人「打靶」，你都咪話唔嚇親人！ 

（Shutterstock圖片）

資產縮水成本大增 ETF可以要求退市

（Shutterstock圖片）

　　究竟ETF或槓桿類ETF係咩情況會宣布退市呢？比較常見就係當資產規模慢慢縮水，同時管理費維持不變（管理費主要用於支付基金經理、法律支援等支出），咁管理成本就提升，資產又未見增值情況下，發行商就因為管理費高昂的因素而「無肉食」，最後就有機會宣布將隻ETF退市。好似三星推出嘅4隻恒指及國企指數槓桿及反向產品，最近表示由於ETF嘅資產總資產淨值少於港幣1.5億港元，所以按照信託契據，基金經理可以全權終止信託。

　　至於退市前後點安排呢？通常發行人會係退市之前一個月通知持貨客戶，好等客戶可以係市場上面走貨；一個月後就會停牌，基金就會計算每基金單位資產仲剩幾多，通常三至四星期後就會發還返畀原本持貨人士，最後退市。不過呢個時候，都可以有搵錢機會！有時候由於持貨客戶聽到隻ETF宣布退市，有機會不問價咁拋貨，令到ETF價格比起資產淨值（NAV）出現折讓，無貨投資者唔介意資金鎖定期比較長都可以執下雞！　

槓桿類ETF同樣有機會「打靶」 分分鐘血本無歸

（Shutterstock圖片）

　　大家玩開「動物」（牛熊證）都知道有｢打靶」機制，但槓桿類ETF同樣都會有呢個情況！以「三倍槓桿ETF」為例子，每當你購入一份相關產品，ETF就會幫你借多兩份等額嘅「孖展」，所以被掛勾產品每升10%，槓桿ETF就會升30%；不過，假如三倍槓桿ETF單日下跌33%或以上，而收市前仍維持呢個水平，由於另外兩份錢都係借返嚟，所以孖展商就會向你追索返保證金，行內稱為「Call 孖展」，隨時同牛熊打靶一樣血本無歸。

　　不過又咁講，通常被掛勾產品都係指數或者期貨居多，比較甚少出現單日下跌10%嘅情況，投資者又唔使過份擔心，好似之前油價跌到「負數」都係百年難得一見，但槓桿類ETF係會存在呢種情況，投資者係買賣時候都要留意市況為主。

ETF未必咁貼追蹤產品 槓桿ETF有一定程度損耗

（Shutterstock圖片）

　　正如早前幾篇文所講，由於ETF只係一種追蹤產品或指數嘅基金，而並非產品本身，所以當被追蹤產品大升大跌時後，ETF未必會咁「貼價」，因為ETF仍會受到市場參與者需求影響，從而出現價差。另外，ETF通常係會有損耗，例如管理費及震盪損耗。管理費係從基金淨值入面扣除，所以投資者買ETF時候都會留意下手續費高低作比較。

　　「震盪損耗」其實唔難明白，例如今日恒指跌10％，咁你隻「三倍槓桿ETF」就要跌30％；就算聽日恒指升返10%，你隻ETF反彈返30%，但都未必回到本！因為10蚊跌30%就等於7元，但7蚊升到10元，就需要升42.85%，但你隻ETF都係升返30%，所以就算恒指返去原價，你都係輸，呢個就係「震盪損耗」，買ETF時候要多加留意啦！

撰文：李皆穎

【你點睇？】美國頒國家安全戰略，擬重新平衡美中經濟關係，強調對華強硬。你點睇此舉對中美關係態勢的影響？► 立即投票