《Make Money》點解要買QQ？因為我都鍾意打機囉！

 　　騰訊(00700)首季業績已經出爐，表現比預期更靚仔，個價又上新高啦！其實，我都係QQ嘅粉絲，因為我都鍾意打機，呢份業績我都有份「貢獻」！！又因為我鍾意打機，我深信QQ好有「錢途」，我都有手700看門口。

　　騰訊業務廣泛大家都知，但估唔到連少女組合都玩埋？今日一文瀏覽騰訊業績重點！
　

(Shutterstock圖片)

1.網絡遊戲成焦點，組合「火箭少女101」Crossover食雞有得做？
　

　　騰訊食胡遊戲不外乎「王者榮耀」、「和平精英」，不過業績提到：《和平精英》與火箭少女101(騰訊旗下的偶像少女組合)嘅合作相當成功，令用戶活躍度再創新高。嘩！連少女組合都有，都真係估你唔到囉！

靚女同「食雞」Crossover，唔知你又buy唔buy呢？(網上圖片)

　　另外，遊戲部分提到旗下公司Riot封測緊嘅遊戲《Valorant》，呢隻game反而係今年遊戲界討論嘅話題之作，相信會喺今年內推出，有機會成為第二隻金蛋！

(官方網站截圖)

2.《三生三世枕上書》熱播，「熱巴」繼續吸客

　
　　早幾年一套《三生三世十里桃花》電視劇喺內地熱播，食過返尋味，今年再整多套《三生三世枕上書》，都係搵返靚女「迪麗熱巴」主演，唔知係咪佢好腳頭呢？所以依然大賣，間接令到騰訊視頻服務會員首季按年增兩成六。

作為內地一線明星，來自新疆嘅迪麗熱巴成為電視劇同綜藝嘅搶手貨(網上圖片)　

3.疫情帶動QQ客仔增
　

　　喺內地個個都有微信，以為已經飽和。但今次世紀疫情下，QQ突然需求加劇，點解？因為班媽媽們成日都開個「QQ家長群」，等阿仔阿女繼續Home Study，老師都透過QQ繼續幫班同學仔上堂，所以QQ發送信息數量同使用時間有雙位數增長。

(Shutterstock圖片)　

　　而微信小程式繼續成為焦點，不斷融入社區生活，目前活躍用戶已經超過4億。唔知大家有唔返大陸食飯呢？掃個QR CODE進入小程式落單，再用佢埋單，真係快靚正！

　　其實騰訊呢兩年業務重點，都放喺遊戲業務同小程式，不過近期大家講緊嘅「雲遊戲」，業績好似無乜點談及，似乎距離推出仲有一段日子喎。　

(官方網站截圖)

　　另外，業績又提到，隨著閱文集團(00772)新管理層上任，騰訊將會深化同閱文合作，可能對閱文股價有新憧憬！大家如果嫌QQ入場費貴，又唔想買賣牛熊證咁高風險，可以退而求其次吼吓隻閱文。

撰文：李皆穎
　

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇