《Make Money》微信女進化變股票導師？小心信錯變慘慘豬！

 　　話說早幾年坊間出現一大堆「微信女」，透過微信「附近的人」尋找獵物，對佢地噓寒問暖之後，就問下佢地有無買股票，繼而推介一啲細價股號碼；小心係莊家想搵人接貨，繼而散水，有小股民仲搞到損失慘重。

（Shutterstock圖片)

　　最近熱話，喺上個月連登財經台有人開Post，話有大量Telegram group，都喺度推介買入途屹控股(01701)，樓主仲呼籲大家要小心避開。果不其然，最終係5月14日炒高上歷史高位3蚊之後，翌日隨即「散水」。　

　　記住，呢個世界係無免費嘅午餐，唔好亂信群組信息！

早係上個月時候已經有人開Post，呼籲大家小心途屹控股會高位派貨（網上截圖）

1.Facebook、Telegram、Whatsapp 無孔不入！

　　其實「微信女」已經開始進化，已經化身為「股票導師」、「分析師」、「股神」，如果大家近期有留意，佢地會喺好多明星或者KOL嘅留言入面突然放條Link，然後叫大家加入群組交流。

呢種股票谷，會先畀一大堆所謂「貼士」，然後在叫你跟注細價股（網絡圖片）

　　呢啲群組都有特點：首先佢地畀一兩隻明星／熱門股要你跟注，例如上圖瑞聲科技（02018)、阿里健康（00241）等，當你贏咗小小甜頭之後，就會要你跟佢買一啲細價股，然後將買入收據交畀佢地，先會有下一個「冧巴」推介畀你。最後結局就係，呢啲細價股高位散水，然後成個群組就會突然解散消失，邊一個接貨就邊個人唔好彩。

最近係面書不同群組，都見到有人呼籲加入呢類群組，美其名為「學習」、「討論」（網上截圖）

2.誰操控群組？

　　如果大家有留意，呢啲群組好多時唔畀人留言，只叫人跟注；就算可以交流都好，你會發現管理員用字比較多書面語，甚少用粵語或本地口吻交流；當你真係跟佢地買咗貨之後，佢地都會要求你畀入貨單據佢地睇。

「微信女」要你交貨單嘅手段都係不變，因為佢地有你張單先可以拆佣（網上圖片）

　　之前有內地媒體《新京報網》已經報道過，佢地曾進入一間名為「巨豐投資」放蛇，發現佢地有好多個「微信美女」帳戶，而且同時由一名男職員控制。所以唔難明白點解佢地講嘢都唔似香港人；而佢地要拎受害人嘅買貨單據，先可以證明到係由邊個員工散貨，從而計返佣金。

3.莊家散水前有跡可尋，關鍵你要識睇圖表！

（Shutterstock圖片)

　　其實行內對於莊家股散貨已經見怪不怪，只不過近年來好似比較積極主動。但作為醒目投資者，人哋點樣「搭雞棚」，其實都有跡可尋：
 

A.股價介乎係幾毫子到三蚊之間，有時候會炒到五﹑六蚊，都係以小型股份為主；

B.平均每日成交量都係幾百萬港紙左右；

C.睇返近幾個月陰陽燭走勢都係呈現一個45度角走勢；

D.莊家「散水」之前個十日八日，股價都會創歷史新高，等散戶以為有大戶追捧。

　　正所謂「便宜莫貪」，一啲細價股無消息、無原因地突然間爆上，都係少沾手為妙。

撰文：李皆穎

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇