《魚缸博客》社交媒體廣傳中國車企情況圖，內地電動車真係危險？

　　近日社交媒體廣傳一張有關於神州車企嘅圖片，名為「新能源品牌走勢」，其中蔚來小鵬形容為「有點危險」，博客睇完張圖都覺得有點兒搞笑。

　　最近內地比較大嘅新聞就係有傳哪吒汽車倒閉在即，好多店鋪都已經靜悄悄關門，二手車商都唔敢收哪吒品牌相關汽車。無可否認，唔少人認為內地車企因為目前「外銷困難」嘅關係，已經開始內捲，相信會開始汰弱留強，大部分科技企業唔夠資本操作就應該會相繼離場，剩返低都係實力企業。

　　零跑(09863)就好似唔係呢張圖入面，但佢旗下汽車過去一年好似賣得幾好，睇返數據2024年好似都賣左接近30萬架，已經係該企業最好成績嘅一年。而且公司剛剛發盈喜，去年第四季度實現淨利潤轉正，較公司目標提前一年實現，主因去年第四季度銷量持續增長，月平均銷售逾4萬台，售價較高嘅C系列車型銷量佔比逾77%，及有效成本控制和運營效率。

　　呢類科技企業起初都係蝕住做，然後靠上市融資維持住個成本控制，只要做到變正數，公司盈利／股價就可能有爆發性增長，所以零跑盤數由負轉正，可能係一個買入訊號，博客認為，除左大廠之外嘅車企可以做到正數絕對唔簡單，可以睇高一線，買少少擺係倉底都唔過分，可以考慮下！

《編者按》本欄搜羅即市傳聞，惟消息未經證實，《經濟通》亦不保證內容之準確性。