《小傳日記》京東「像素級模仿」HKTV，本地薑遭遇文化衝擊！

　　京東(09618)近期動作多多，繼早前喺內地啟動京東外賣後，近日強勢攻港。喺港島柴灣佔地過萬呎的運營中心投入運營，並推出一系列燒錢吸客策略，包括推出「總值百萬優惠券」活動，又提供600銀新人專屬禮包等福利。除咗推出大規模補貼家電商品，仲提供埋自營家電「30日包退、180日有壞換新」、「一件包郵」等優惠政策，攻勢可謂一浪接一浪！

　　明明京東國內版App已經有現成界面，但佢嘅港版App睇落就相當local，係咪夠貼地先？咪住，開埋我哋本地薑HKTVmall嘅App嚟睇下先，乜咁似樣嘅？HKTVmall有「挑戰全港至抵價」，京東香港就有「挑戰全港比價」；HKTVmall有「日日秒殺價」，京東香港同樣有個「日日秒殺價」；至於HKTVmall為紀念10周年增設「每日一店」優惠，京東香港當然無十周年啦，但一樣有「每日一店」。齋係名似都算喇，佢甚至連UI設計同配色都幾乎一摸一樣。香港科技探索(01137)行政總裁「魔童」王維基都不得不發文，直指京東香港App「學」足HKTVmall，真係「難分真與假」。

　　由於一啲眾所周知嘅原因，大部分海外互聯網公司都無辦法喺神州提供服務，為當年方興未艾嘅神州互聯網行業帶來機會，唔少初創公司都對海外成功案例進行「像素級模仿」，做出「現象級」產品，之後再考慮在地化嘅問題。上文提到所謂嘅「像素級」並唔係誇張，有啲勤勞苦幹嘅互聯網公司係會連對方嘅字體、用色、排版、文案都照搬，好聽啲講，係通過100%嘅模仿去加速學習進程，難聽啲講，咪即係抄。

　　不過公平啲講，「像素級模仿」嘅情況都唔止出現喺神州互聯網公司，Meta老闆朱克伯格都係模仿大師，旗下社交平台Threads近來喺港台熱爆，其實本質上都係X嘅模仿產品。

　　流量時代唔怕爭議只怕無人識，京東香港將王維基嘅炮火視作流量機會，直接發文回應！京東話感謝對方嘅關注，強調唔係要同邊個鬥，而係想為香港市民帶來真正優惠。京東又話，香港物價較內地高出唔少，當中包括高昂租金、運費及服務費，而京東採用嘅營運模式可將成本壓到最低，呼籲王維基同京東共同以實際行動為市民謀福利。

　　同美團(03690)Keeta當年攻港一樣，京東出手亦不留情，除咗推出「買貴就賠」政策，仲要搞埋免費家電安裝服務，直接喊話王維基，叫HKTVmall不妨都「學」下京東香港嘅服務，挑機味十足！　

　　不過王老闆都唔執輸，就京東香港推出「買貴就賠」政策一事，質疑點解「買貴就賠」只包括百佳、惠康、百老匯和豐澤等，但就唔包括HKTVmall在內？係睇HKTVmall唔起，定係因為唔夠HKTVmall平？

　　其實，京東同HKTVmall雖然都係電商，但業務重疊部分其實唔係太多。京東出名以家電及日用百貨為主，舊年該兩大業務佔總營業額八成。而按照HKTVmall舊年上半年商品交易分布，其中糧油雜貨及美健產品兩項合佔總交易額67.7%，相反電子電器產品只佔10.5%。所以，兩家企業正面交鋒嘅情況應該無想象中咁激烈。

　　坦白講，香江市場咁細，京東大雞根本唔志在食細米，不過當係踏跳板，為開拓國際市場做熱身。點都好，京東香港同王老闆呢場口水戰目前戰果睇嚟似乎係雙贏，各大媒體爭住報道，為兩家企業免費賣廣告，如果可以做大本港網購嘅餅，咁王老闆都應該樂見其成，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。