《小傳日記》車企銷量確實好，咁賺錢能力好唔好？

　　各大車企近日陸續公布10月份銷售數據，除咗長城汽車(02333)銷量按年跌11%之外，其餘大部分車企10月銷量都錄得唔錯嘅增幅。龍頭車企比亞迪(01211)單月汽車銷量達50.3萬輛，首次突破50萬輛大關，刷新埋全球新能源車企紀錄，而且按年大升66.5%，銷量確係好。至於其他主要車企如吉利汽車(00175)、理想汽車(02015)、小鵬汽車(09868)、蔚來集團(09866)等，10月汽車銷量比起舊年都錄得20%至30%升幅，個別如零跑汽車(09863)10月份交付量按年更飆升逾倍。
　　數據方面靚靚仔仔，真係無可挑剔。就算今日大市窄幅上落，升跌唔多，但汽車板塊有理無理全線上升，就連長城汽車都要升4%，而無公布最新銷售數據嘅東風集團(00489)同華晨中國(01114)股價都分別升5%同6%，可見大家都對於車企近期銷售成績相當受落。
　　不過，銷量出色係咪等於盈利方面一樣咁出色？筆者要再強調多次，大部分新勢力品牌都係未賺錢㗎！至於已經盈利、表現最標青嘅理想汽車，今年第三季度汽車交付量按年增長45.4%，但期內車輛銷售收入為413億元人民幣，按年升幅只有22.9%，而期內淨利潤為28.2億元人民幣，按年升0.3%，隨時可能「翻車」轉蝕！所以缸友們要睇清睇楚。
　　講番宏觀背景，車企10月銷售數據中所以咁強勁，多少因為早前內地推出以舊換新政策落地，同埋9月底人行降準扶持經濟有關，但呢啲舉措只能對短期銷量有刺激作用，長遠仲係要睇未來經濟發展。而且，一個普通家庭最多可以養到一兩部車，換完一次之後，要等幾耐先等到第二次換車潮？
　　另外，如今新能源車銷量大增係淘汰傳統能源車換來嘅結果，難以理解今日傳統能源車車企一樣升到㷫烚烚。以東風集團為例，雖然該集團暫未見公布10月份銷售數據，但今年頭9個月汽車銷量下跌8.4%，長城汽車今年第三季度盈利下跌8%，而廣汽集團第三季度更加轉賺為蝕14億人仔，舊年同期賺15億人仔，差別何其大！
　　10月28日，中國乘聯分會秘書長崔東樹喺佢個人微信公眾號發布最新統計數據顯示，2024年1至9月汽車行業總收入73593億元人仔，按年僅升3%，但總利潤3360億元人仔，按年下跌1.2%；頭九個月，汽車行業整體利潤率僅為4.6%。值得一提嘅係，單計9月份，汽車行業嘅利潤總額只得324億元人仔，按年大跌28.5%；而9月份利潤率更跌至3.4%，唔單止係今年以來最低嘅一個月，仲係近4年以來第二低嘅月份。所以，炒車股要小心，追得太貼因住隨時炒車。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。